Samarqandlik erkak 2 nafar jizzaxlikni pichoqlab qoʻydi
Oqibatda ulardan biri shifoxonada vafot etgan.
Jizzax shahrida 8-avgust kuni mavsumiy ishchilar oʻrtasida janjal sodir boʻldi. Bu haqda viloyat IIB axborot xizmati xabar qildi.
Qayd etilishicha, oʻsha kuni soat 21:30 larda Zarbdor tumani Taraqqiyot mahallasi hamda Forish tumani “Bogʻdon” QFYda istiqomat qiluvchi 38 va 31 yoshli ikki fuqaro oʻzaro gaplashib turganda Samarqand viloyati Bulungʻur tumani Qangli qishlogʻida yashovchi 1966-yilda tugʻilgan fuqaro ularning suhbatiga kelib qoʻshilgan.
Zarbdorlik shaxs samarqandlik erkakning koʻylagi choʻntagidan hazillashib 50 ming soʻm pullarini olib qoʻygan vaqtida janjal kelib chiqqan. Nizo davomida bulungʻurlik shaxs sumkasida boʻlgan oshxona pichogʻi bilan ushbu ikki fuqaroga tan jarohati yetkazgan. Oqibatda Zarbdor tumanida yashovchi fuqaro koʻrsatilgan tibbiy yordamga qaramasdan vafot etgan, tan jarohati olgan ikkinchi shaxs esa Respublika shoshilinch tez tibbiy yordam ilmiy markazi Jizzax filialining jonlantirish boʻlimiga yotqizilgan.
Holat yuzasidan Jizzax shahar prokuraturasi tomonidan jinoyat ishi qoʻzgʻatilib, gumonlanuvchi ehtiyot chorasi sifatida qamoqqa olingan.
