Andijonda 23 yoshli talaba joniga qasd qildi
U oʻzini yotoqxona hojatxonasiga osib qoʻygan.
Andijon mashinasozlik instituti “Logistika” taʼlim yoʻnalishining 2-bosqich talabasi oʻz joniga qasd qildi. Bu haqda Bosh prokuratura matbuot kotibi Hayot Shamsutdinov maʼlum qildi.
5-avgust kuni Toshkent viloyati Boʻka tumanida 1999-yilda tugʻilgan Q. D. Andijon mashinasozlik instituti talabalar yotoqxonasiga bir oʻzi kelib, shu yerda tunab qolgan. Ertasi kuni soat 09:30 larda yotoqxonaning hojatxonasi eshigiga kabeldan sirtmoq yasab, oʻzini osib qoʻygan.
Talabaning oʻlim sababini aniqlash yuzasidan sudga oid tibbiy hamda sud-biologik ekspertizasi tayinlangan. Shahar prokuraturasi tomonidan marhumning oʻz joniga qasd qilishi sabablari aniqlanmoqda.
Hozirda tergovga qadar tekshiruv harakatlari davom ettirilmoqda.
