Toshkentdagi bogʻchada 3 yoshli bolaning yuzi kuydi
IIBB hodisa sababini maʼlum qildi.
Ijtimoiy tarmoqda Toshkent shahridagi xususiy bogʻchalarning birida bolaning yuzi kuygani aks etgan xabarlar tarqaldi. Holat yuzasidan shahar IIBB axborot xizmati rasmiy maʼlumot berdi.
Hodisa 10-avgust kuni Toshkent shahrining Chilonzor tumanidagi xususiy maktabgacha taʼlim muassasasida sodir boʻlgan. 2019-yilda tugʻilgan tarbiyalanuvchi M. A. qarovsiz qolgan vaqtida ayollar sumkasida boʻlgan koʻzga surtuvchi boʻyoqni oʻynab, yuz qismiga surtgan.
Bu holatni ushbu tashkilotda tarbiyachi boʻlib ishlovchi 38 yoshli Zuxra A. koʻrib qolib, bolaning yuzini tozalash maqsadida “tibbiy vositalar”dan surtgan. Natijada voyaga yetmagan bolaning yuz qismi qizarib, kuyish alomatlari mavjudligi sababli tibbiyot muassasasiga murojaat qilingan.
Bolaning olgan tan jarohatini aniqlash uchun sud-tibbiy ekspertizasi tayinlangan. Hozirda Chilonzor tumani IIO FMB tomonidan tergovga qadar tekshiruv ishlari olib borilmoqda.
