Prezident Shavkat Mirziyoyev Umra ziyoratida — fotogalareya
Davlat rahbari Kaʼbatullohning ichida namoz o‘qidi.
Shavkat Mirziyoyev Saudiya Arabistoniga tashrifi chog‘ida muqaddas Makka shahrida ham bo‘lib, umra amallarini bajardi. Bu haqda davlat rahbarining matbuot xizmati xabar berdi.
O‘zbekiston Prezidenti Islom dini arkonlariga muvofiq ehromga kirib, namoz o‘qigan, talbiya aytib, Masjidul Haromga borgan.
«Maʼlumki, Kaʼbatullohning ichiga kirish musulmonlar orzu qiladigan ulug‘ sharafdir. Prezidentimiz ana shunday sharafga muyassar bo‘lib, Kaʼbatullohning ichida namoz o‘qidi. So‘ng, Baytulloh atrofida yetti bor tavof, Safo va Marva tepaliklari orasida yettita saʼy qilindi», — deyiladi xabarda.
O‘zbekiston delegatsiyasi aʼzolari, ulamo va ziyolilar bilan birgalikda yurtimizga tinchlik va taraqqiyot, xalqimizga salomatlik va farovonlik tilab duolar o‘qilgan.
O‘zbekiston Prezidentining Saudiya Arabistoniga davlat tashrifi yakunlab, 19 avgustga o‘tar kechasi Jiddadan Toshkentga jo‘nab ketdi.
Shavkat Mirziyoyev 17 avgust kuni valiahd shahzoda Muhammad bin Salmon Ol Saud bilan muzokara o‘tkazdi. Uning natijalari bo‘yicha O‘zbekiston bilan Saudiya o‘rtasida keng qamrovli sheriklik munosabatlarini yana-da kengaytirish to‘g‘risida Qo‘shma bayonot, shuningdek, energetika, bojxona, fuqaro aviatsiyasi, turizm, qishloq xo‘jaligi, sog‘liqni saqlash, mehnat munosabatlari sohalarida 15 ta hujjat qabul qilingan.
18 avgust kuni Islom hamkorlik tashkiloti hamda Islom taraqqiyot banki rahbarlari, saudiyalik ishbilarmonlar bilan uchrashuvlar o‘tkazilgan.
