Sizdan ugina, bizdan bugina: Toliblar Rossiyadan mayiz evaziga neft so‘rayapti
Afg‘oniston Moskva bilan barter savdosini yo‘lga qo‘ymoqchi.
Afg‘onistondan mayiz, foydali qazilmalar va dorivor o‘tlar evaziga Rossiyadan neft mahsulotlari sotib olmoqchi. Bu haqda mamlakat savdo vaziri Nuriddin Aziziy “RIA Novosti” agentligiga bergan intervyusida maʼlum qilgan.
“Bizning rejalarimizda Rossiya tovarlarini barter evaziga import qilish. Agar bu amalga oshmasa, moliyaviy tranzaksiyalar orqali savdo qilishga tayyormiz. Bu masalada hech qanday muammo yo‘q — xomashyo sotib olish uchun YEI yoki AQSH Afg‘onistonga hech qanday cheklov qo‘ymagan, biz tovarlar uchun pul to‘lashimiz mumkin”, – degan vazir.
Uning qo‘shimcha qilishicha, Kobul yil oxiriga qadar Moskvadan 1 million tonna benzin va 1 million tonna dizel yoqilg‘isini sotib olish istagida.
Neft mahsulotlari evaziga Afg‘oniston foydali qazilmalar taklif qilishi mumkin.
“Bundan tashqari, bizda quruq mevalar va dorivor o‘tlar bor. Afg‘oniston tarixan Rossiyaga katta hajmda mayiz yetkazib bergan. Biz yuzlab tonna shu turdagi mahsulotlar eksport qilishimiz mumkin. Hozirda dorivor o‘tlar narxi juda baland. Rossiya esa shu turdagi xomashyoga muhtoj”, – deb qayd etgan Aziziy.
Avvalroq Rossiya TIV Afg‘onistondan Markaziy Osiyoga narkotiklar kirib kelishi ko‘paygani to‘g‘risida maʼlumot bergandi.
