Andijonda yana bir tadbirkor o‘zini osib qo‘ydi
Holat yuzasidan hokimlik munosabat bildirdi.
Ijtimoiy tarmoqda andijonlik tadbirkor Jalaquduq tumanida o‘zi qurayotgan maktabning sport zalida osib qo‘ygani haqida xabar tarqaldi. Hodisaga tadbirkor pullarini ololmagani sabab bo‘lgani aytilmoqda.
Rasmiy xabarga ko‘ra, 20-avgust kuni Ulug‘nor tumani “Bobur” MFY Furqat ko‘chasida yashagan fuqaro V.A Jalaquduq tumanidagi 29-sonli maktab sport zalida o‘zini osib, o‘z joniga qasd qilgan.
Marhumning tanasi sud-tibbiy ekspertizasi byurosi ekspertlari ishtirokida ko‘zdan kechirilganida, uning badanida bo‘ynidagi osilishdan qolgan strangulyatsion egat ko‘rinishidagi izlardan tashqari biron-bir tan jarohatlar aniqlanmagan.
Holat yuzasidan viloyat hokimligi tomonidan o‘rganish ishlari olib borilgan. Aniqlanishicha, tadbirkorga hech kim, na prokuror, na hokim tazyiq o‘tkazmagan.
“Tadbirkorga qurilishi olib borilayotgan loyiha qiymatining 85 foizi miqdorida mablag‘ ajratilgan”, — deyiladi viloyat hokimligi xabarida.
Hozirda marhumning o‘z joniga qasd qilganligi sabablarini aniqlash yuzasidan Jalaquduq tuman prokuraturasi tomonidan tergovga qadar tekshiruv harakatlari o‘tkazilmoqda.Tekshiruv harakatlari viloyat prokuraturasi tomonidan nazoratga olingan.
Eslatib o‘tamiz, bundan oldin Andijon viloyatining Shahrixon tumanida 45 yoshli tadbirkor o‘ziga tegishli mevali bog‘da joniga qasd qilib, vafot etgandi. Ushbu voqeadan ikki kun keyin uning otasi ham olamdan o‘tgan.
