Qashqadaryoda elektr tarmoqlari korxonasi ishchisi tok urib, vafot etgani aytildi
Hodisa bugun tushlik vaqtida sodir bo‘lgan.
Bugun, 23-avgust kuni Qashqadaryo viloyatining Gʻuzor tumanida hududiy elektr tarmoqlari korxonasi xodimi ish vaqtida tok urib, halok bo‘lgani aytilmoqda. Bu haqda “Nasafnews” nashri xabar berdi.
Qayd etilishicha, korxonaga qarashli podstansiya xizmatining 38 yoshli xodimi S. B. tushlik paytida xizmat vazifasini bajarish chog‘ida vafot etgan.
“Dehqonobod tumani Boyqo‘rg‘on qishlog‘iga borgan vaqtda yuragi to‘xtagan va ular birinchi yordam ko‘rsatishgan. Keyin ishchi Gʻuzor tumani shifoxonasiga olib kelingan va vafot etgan”, — deya ma’lumot bergan korxona rahbari Erkin Pardayev.
Marhum ishchi Gʻuzor tumani Batosh mahallasida istiqomat qilgan.
