Abening o‘ldirilishi ortidan Yaponiya politsiyasi rahbari isteʼfoga ketdi
U o‘z xohishi bilan lavozimini tark etgan.
Yaponiya politsiya bosh boshqarmasi rahbari Itaru Nakamura isteʼfoga chiqdi. U sobiq bosh vazir Sindzo Abega uyushtirilgan suiqasdda xavfsizlik choralari yetarli darajada ko‘rilmagani uchun javobgarlikni zimmasiga olmoqchi.
“Xavfsizlikni taʼminlash tizimi tubdan qayta ko‘rib chiqiladi”, – degan u.
Kyodo agentligi maʼlumotlariga ko‘ra, Nakamura jamoat xavfsizligi bo‘yicha komissiyaga isteʼfoga ketish istagini bildirgan. Bu 26 avgustda amalga oshishi kutilmoqda.
Politsiya boshqarmasi Abe nutq so‘zlayotgan paytda qo‘riqchilar to‘g‘ri joylashtirilmaganini aniqlagan. Bu uning o‘limiga olib kelgan asosiy omillardan biri sifatida ko‘rilmoqda.
Maʼlumot o‘rnida: Sindzo Abe Yaponiya tarixidagi eng mashhur bosh vazir hisoblanadi. U 8 iyul kuni qotillik qurboniga aylandi.
