Toshkent tibbiyot akademiyasi kontrakt narxlari oshganini tasdiqladi
Ammo vazirlik buni inkor etmoqda.
Oliy va o‘rta maxsus ta’lim vazirligi ijtimoiy tarmoqlarda tarqalayotgan va muhokamalarga sabab bo‘layotgan davlat oliy ta’lim muassasalarida bazaviy to‘lov-kontrakt miqdorlarining oshirilgani to‘g‘risidagi xabarlarga rasmiy munosabat bildirdi.
Vazirlik o‘z bayonotida tarqalgan xabarlar noto‘g‘ri ekanini ma’lum qilgan.
Qayd etilishicha, ayni paytda bazaviy to‘lov-kontrakt miqdorlari 2022/2023-o‘quv yili uchun tasdiqlanishi kutilmoqda. Vazirlik ushbu masala rasmiy e’lon qilinmagunga qadar barcha davlat oliy ta’lim muassasalari, shu jumladan moliyaviy mustaqillik berilgan ta’lim tashkilotlari ham rasmiy bayonot berishini asossiz deb hisoblaydi.
Eslatib o‘tamiz, avvalroq moliyaviy mustaqillikka erishgan Toshkent tibbiyot akademiyasida joriy o‘quv yili uchun kontrakt narxlari stipendiyasiz holatda 9 mln so‘mdan 19 mlngacha oshirilgani xabar qilingandi. Shundan so‘ng akademiya prorektori videomurojaat bilan chiqib, yuqorida keltirilgan narx joriy yilda o‘qishga qabul qilingan birinchi kurs talabalari uchun amal qilishini aytdi.
Shuningdek, prorektor o‘z videomurojaatida aytilgan gaplarni haqiqiy va asosli ekanini ta’kidlagan. Ammo vazirlik barcha davlat OTMlari va moliyaviy mustaqillik berilgan ta’lim tashkilotlarining bayonotini asossiz deb hisoblamoqda.
