Mustaqillik bayrami arafasida bir guruh diplomatik missiya rahbarlariga oliy martabalar berildi
Bu bo‘yicha Prezident farmoni qabul qilindi.
O‘zbekiston mustaqilligining 31 yilligi arafasida Prezidentning tegishli farmonlari bilan qator diplomatik missiyalar rahbarlariga oliy diplomatik martabalar berildi. Bu haqda Prezident matbuot kotibi Sherzod Asadov ma’lum qildi.
Farmonga ko‘ra, O‘zbekiston Respublikasining Xitoy Xalq Respublikasidagi elchisi Farxod Arziyev va Turkmanistondagi elchisi Akmaljon Kuchkarovga Favqulodda va Muxtor elchi martabasi berilgan.
O‘zbekiston Respublikasining Avstriya Respublikasidagi elchisi Abat Fayzullayev, YUNESKOdagi doimiy vakili Umid Shodiyev va Jenevadagi BMT bo‘linmasidagi doimiy vakili Ulug‘bek Lapasovga 2-darajali Favqulodda va Muxtor vakil martabasi berilgan.
“Oliy martabalarga sazovor bo‘lgan diplomatlarimizni chin dildan qutlab, kelgusi faoliyatiga muvaffaqiyatlar tilaymiz”, — deyiladi xabarda.
