BMT: Afg‘onistonga gumanitar yordam uchun 3 milliard dollardan ortiq mablag‘ kerak
Mamlakatda oziq-ovqat taʼminoti bilan bog‘liq muammo borligi aytildi.
Afg‘onistonda 6 million kishi ochlik yoqasida turibdi. Bu haqda BMT bosh kotibining gumanitar masalalar bo‘yicha o‘rinbosari Martin Graffits maʼlum qildi.
Diplomat “Tolibon” hokimiyatga kelgandan so‘ng Afg‘onistonda oziq-ovqat xavfsizligi yana-da og‘irlashganini taʼkidlagan. Jumladan, 25 million afg‘onlar qashshoqlikda yashamoqda. Bundan tashqari, 3 million bolalar ochlikdan aziyat chekyapti.
Aholi daromadlarining uchdan biri oziq-ovqatga ketayotgani, yil oxiriga qadar 40 foiz odamlar ishsiz qolishi mumkinligi qayd etilgan.
Graffits Afg‘onistonga gumanitar yordamni moliyalashtirish bilan bog‘liq muammolar paydo bo‘lganini aytgan. Xususan, hozirda shu maqsadlarga 3.14 milliard dollar mablag‘ yetmayapti. Uning 600 millioni qishga tayyorgarlik uchun zarur. Ushbu muammolarni 3 oyda hal qilish kerak.
Avvalroq “Tolibon” hokimiyati davrida Afg‘onistonda gumanitar vaziyat og‘irlashgani to‘g‘risida xabar berilgandi.
.
