Hamma rus gazidan voz kechayotgan paytda Vengriya "Gazprom" bilan shartnoma imzoladi
Budapesht Rossiyadan gaz importini oshiradi.
Vengriya Rossiya bilan qo‘shimcha gaz yetkazib berish bo‘yicha kelishuvga erishdi. Bu haqda mamlakat hukumati rasmiy vakili Zoltan Kovach maʼlum qildi.
"Gazprom" bilan tuzilgan yangi shartnomaga binoan, 1 sentyabrdan kuniga qo‘shimcha 5.8 million kubometr gaz import qilinadi.
Vengriya TIV rahbari Peter Siyyartoning so‘zlariga ko‘ra, kelishuv 2 oyga tuzilgan. Gaz esa Serbiya orqali yetkazib beriladi.
O‘tgan yili Budapesht Moskva bilan uzoq muddatli gaz kelishuviga erishgandi.
Vengriyaning Rossiya gaziga qaramligi kuchli. U Yevroittifoqdagi Moskva energoresurslarining embargosiga qarshi turgan asosiy davlat sanaladi.
Avvalroq Vengriya bosh vaziri Viktor Orban RFga qarshi sanksiyalar siyosatidan voz kechishga chaqirgandi.
