Pokiston: toshqin oqibatida qurbonlar soni 1000 dan oshdi
Kuchli yomg‘ir va suv toshqinlari Pokiston hududining uchdan bir qismini suv bosdi
Bosh vazir Shehbaz Sharifning aytishicha, 1100 dan ortiq odam, jumladan 380 ga yaqini bolalar halok bo‘lgan.
Rasmiylarning hisob-kitoblariga ko‘ra, 33 million kishi, yaʼni 220 millionlik Pokiston aholisining 15 foizdan ortig‘i toshqindan jabr ko‘rgan.50 mingdan ortiq odam mamlakat shimoli-g‘arbidagi ikkita boshpanaga evakuatsiya qilingan.
Tabiiy ofatlarga qarshi kurash milliy agentligi rahbari Axtar Navozning aytishicha, Pokistonning 160 tumanidan 72 tasi tabiiy ofatdan jabr ko‘rgan. 800 ming gektardan ortiq qishloq xo‘jaligi yerlari suv ostida qolgan.
Joriy yilning avgust oyida mamlakatda yog‘ingarchilik 30 yillik o‘rtacha ko‘rsatkichdan qariyb 190 foizga ko‘p, jami 390,7 mm.ni tashkil etdi. 50 million aholisi bo‘lgan Sind provinsiyasi eng ko‘p jabr ko‘rdi va yomg‘ir 30 yillik o‘rtacha ko‘rsatkichdan 466 foizga ko‘p yog‘di.
BMT Bosh kotibi Antoniu Guterrish xalqaro hamjamiyatga murojaat qilib, 5,2 million kishini oziq-ovqat, suv, sanitariya va tibbiy yordam bilan qo‘llab-quvvatlash uchun 160 million dollar ajratishni so‘radi.
Pokiston allaqachon Xalqaro valyuta jamg‘armasidan 1,1 milliard dollar moliyaviy yordam olgan. Hukumatning dastlabki hisob-kitoblariga ko‘ra, toshqinlardan ko‘rilgan zarar 10 milliard dollardan ortiqni tashkil qilgan.
