Toshkentda texnopark ichidagi sex yonib ketdi
Hodisa joyiga 11 ta qutqaruv ekipaji yuborilgan.
Bugun, 1-sentyabr kuni Toshkent shahrining Yakkasaroy tumanidagi ishlab chiqarish sexida yong‘in sodir bo‘ldi. Bu haqda Favqulodda vaziyatlar vazirligi Matbuot xizmati xabar berdi.
Qayd etilishicha, soat 16:26 da Qo‘shbegi dahasida joylashgan Yakkasaroy texnoparki hududidagi ishlab chiqarish sexining tom va ichki qismida taxminan 1000 kvadrat metr maydonida yong‘in chiqqan. Shunga ko‘ra, yong‘in-qutqaruv ekipajlari soat 16:31 da hodisa joyiga yetib borib, yong‘in soat 17:29 da qurshab olingan va soat 18:07 da bartaraf etilgan.
Voqea joyiga O‘zbekiston Respublikasi FVV rahbariyati, Toshkent shahar FVB va tuman FVB rahbar xodimlari yetib borgan. Yong‘inni bartaraf etishga 11 ta yong‘in-qutqaruv ekipaji, 2 ta maxsus suv tashishga mo‘ljallangan (vodovoz) avtomobil, 1 ta qutqaruv otryadi jalb etilgan.
Hodisa oqibatida fuqarolarning tan jarohati olish va halok bo‘lish holatlari to‘g‘risida xabar kelib tushmagan. Hozirda yong‘inning kelib chiqish sababi va keltirilgan moddiy zarar miqdori aniqlanmoqda.
