Samarqanddagi “Nomsiztepa” yodgorligiga 4,3 mlrd zarar yetkazildi
Bu bo‘yicha tegishli hujjatlar huquqni muhofaza qiluvchi organlarga taqdim etilgan.
Samarqand viloyatining Jomboy tumanidagi “Nomsiztepa” arxeologik yodgorligiga zarar yetkazish holati aniqlandi. Bu haqda Madaniy meros agentligi xabar qildi.
Qayd etilishicha, ushbu yodgorlik Vazirlar Mahkamasining “Moddiy madaniy merosning ko‘chmas mulk obektlari milliy ro‘yxatini tasdiqlash to‘g‘risida”gi qarori bilan davlat himoyasiga olingan.
O‘ganish natijasida arxeologik yodgorlikning g‘arbiy tomonidan uzunligi 120 metr eniga 1,5 metr va balandligi 1 metr umumiy hajmi 180 metr kub tuproq tekislanib olinganligi aniqlangan.
Hududiy boshqarma tomonidan tuproq qazib olish jarayoni to‘xtatilgan va javobgarlarga nisbatan ogohlantirish berilgan. Arxeologiya obektiga yetkazilgan zarar miqdori 4,3 mlrd so‘m etib belgilangan va holatga huquqiy baho berish uchun hujjatlar rasmiylashtirilib, huquqni muhofaza qilish organlariga taqdim etilgan.
“Ko‘rilgan chora yuzasidan qo‘shimcha ma’lumot beriladi”, — deyiladi xabarda.
