Toshkent viloyatida Laсetti beton to‘siqqa urilib, butunlay yonib ketdi
IIBB YHXB hodisa tafsilotlarini ma’lum qildi.
Ijtimoiy tarmoqlarda Toshkent viloyatining Yuqori Chirchiq tumanida Lacetti avtomashinasi yonib ketgani haqida videoxabar tarqaldi. Holat yuzasildan viloyat IIBB YHXB axborot xizmati rasmiy munosabat bildirdi.
Hodisa bugun, 3-sentabr kuni soat 14:15 larda Toshkent viloyati Yuqori Chirchiq tumani hududidan o‘tgan davlat ahamiyatiga ega 4P17a avtomobil yo‘lining 4-kilometrida yuz bergan.
Chirchiq shahrida yashovchi 21 yoshli haydovchi Q.Sh. Lacetti rusumli transport vositasida harakatlanib ketayotib, rul boshqaruvini eplay olmay qolgan va yo‘lning o‘ng chetidagi beton to‘siqqa borib urilgan. Zarb oqibatida avtomobilda yong‘in kelib chiqqan va transport vositasi to‘liq yonib ketgan. Haydovchiga voqea joyida birinchi tez tibbiy yordam ko‘rsatilgan.
Hozirda Yuqori Chirchiq tumani IIB YHXB tomonidan surishtiruv ishlari olib borilmoqda.
