Samarqandda 61 yoshli ayolga tegajog‘lik qilgan erkak ushlandi
U joriy yilning mart oyidan beri qiduruvda bo‘lgan va Jizzax viloyatida yashirinib yurgan.
Samarqand viloyatining Pastdarg‘on tumanida 1961-yilda tug‘ilgan ayolning nomusiga tegganlikda gumonlanib, tergov organlaridan yashirinib yurgan, tumanning Havzak mahallasida yashovchi 1986-yilda tug‘ilgan K.D qo‘lga olindi. Bu haqda viloyat IIB axborot xizmati xabar bermoqda.
Olib borilgan keng qamrovli qidiruv tadbirlari natijasida ushbu shaxs dastlab Jizzax viloyati Zarbdor tumanida, keyinchalik Arnasoy tumanida yashirinib yurgani to‘g‘risida ma’lumot olingan.
U Arnasoy tumanida joylashgan ko‘l ortidagi chekka bir hududda yashirinib yurgan vaqtida IIB xodimlari tomonidan qo‘lga olingan. U ayni paytda Pastdarg‘om tumani IIBga olib kelingan va tergov harakatlari olib borilmoqda.
Ushbu shaxsga nisbatan 2022-yilning 12-mart kuni Jinoyat kodeksining 118-moddasi 1-qismi bilan jinoyat ishi qo‘zg‘atilgan. Sirtdan ayblov e’lon qilinib, qamoqqa olish tarzida ehtiyot chorasi qo‘llangan va qidiruvga berilgan.
