Bundan buyon so‘rov qattiq bo‘ladi—Prezident
Shavkat Mirziyoyev agrar sohada eskicha ishlayotgan rahbarlar faoliyatini tanqid qildi.
Bugun, 5 sentyabr kuni Prezident Shavkat Mirziyoyev raisligida asosiy oziq-ovqat mahsulotlari narxlari barqarorligini ta’minlash va zaxirasini yaratish masalalari yuzasidan videoselektor yig‘ilishi o‘tkazilmoqda.
Yig‘ilishda davlat rahbari agrar sohadagi islohotlarni jadal amalga oshirish birinchi navbatda ushbu soha rahbarlarining fidoyiligiga bog‘liqlinini aytib o‘tdi.
“Bandlikni ko‘paytirish, kambag‘allikni qisqartirish ham birinchi galda qishloq xo‘jaligidagi o‘sishga bog‘liqligini ular tushunishi kerak", dedi Prezident.
Shuningdek, Bosh vazir o‘rinbosari Sh.Gʻaniyev, Fermer, dehqon xo‘jaliklari va tomorqa yer egalari kengashi raisi A.Xaitov hali eskicha ishlayotgani, balandparvoz raqamlarga berilib ketgani tanqid qilindi.
Soha rahbarlarining vazifasi Prezidentga katta-katta raqamlar bilan hisobot berish emas, qishloqdagi dehqon, fermer masalasini hal qilish, og‘irini yengil qilish ekani ko‘rsatib o‘tildi.
Muhim ishlar chetda qolib, qo‘shib yozishlar, noma’qul ishlar ko‘payib borayotgani qat’iy tanqid ostiga olindi.
Yo‘l qo‘ygan kamchiliklari uchun qishloq xo‘jaligi vazirining birinchi o‘rinbosari Sh.Teshayev lavozimidan ozod etilgani, vazir o‘rinbosari Sh.Mirzayevga hayfsan berilgani aytildi.
“Bundan buyon Gʻaniyevdan ham, Xaitovdan ham, yangi vazir Voitovdan ham juda qattiq so‘rov bo‘ladi”, — dedi Prezident so‘zining yakunida.
Yig‘ilishda muhokama qilingan masalalar yuzasidan mutasaddilarning hisoboti eshitildi.
