Toshkentdagi restoranlardan birida yong‘in chiqdi
Hodisa joyiga 4 ta yong‘in-qutqaruv ekipaji yuborilgan.
Bugun, 7-sentyabr kuni Toshkent shahrining Mirobod tumanidagi restoranda yong‘in chiqdi. Bu haqda Favqulodda vaziyatlar vazirligi Matbuot xizmati xabar bermoqda.
Qayd etilishicha, soat 17:31 da Mirobod tumani Shahrisabz ko‘chasida joylashgan “Brasserie” restoranida yong‘in sodir bo‘layotganligi to‘g‘risida shahar FVBga xabar kelib tushgan. Shunga ko‘ra, 4 ta yong‘in-qutqaruv ekipaji soat 17:40 da voqea joyiga yetib borgan va yong‘in soat 17:51 da bartaraf etilgan.
Hodisa oqibatida tan jarohati olish va halok bo‘lish holatlari qayd etilmagan. Restoran oshxonasining taxminan 50 kvadrat metr maydonda tomi va shift qismi yonib zararlangan. Yong‘indan binoning 200 kvadrat metr maydoni saqlab qolingan.
Hozirda yong‘inning kelib chiqish sababi va moddiy zarar miqdori aniqlanmoqda.
