Arizona va Texas gubernatorlari Vashingtonga migrantlarni jo‘natmoqda
Shu munosabat bilan shaharda favqulodda holat eʼlon qilingan.
Vashingtonda migrantlar oqimi tufayli favqulodda holat eʼlon qilindi. Ular poytaxtga Meksika bilan chegaradosh shtatlar — Texas va Arizona gubernatorlari tomonidan yuborilmoqda.
Favqulodda holat rejimi qachongacha davom etishi ochiqlanmagan. Vashington meri Myuriel Bouzerning so‘zlariga ko‘ra, Texas va Arizona Oq uyning eʼtiborini jalb qilish uchun bahordayoq migrantlarni jo‘natishni boshlagan. Shu vaqt oralig‘ida shaharga 9400 xorijlik kelgan. Ushbu muammoni hal etish maqsadida migrantlar masalalari bo‘yicha boshqarma tashkil etilgan.
Uning faoliyati uchun 10 million dollar ajratilgan, Vashington rasmiylari bu summa uchun federal hukumatdan kompensatsiya talab qilmoqchi. Boshqarma migrantlarni vaqtinchalik joylashtirish, oziq-ovqat bilan taʼminlash va ortga surib bo‘lmaydigan holatlarda tibbiy yordam ko‘rsatish bilan shug‘ullanadi.
Avvalroq Bagam orollaridan AQSHga kelayotgan migrantlar kemasi ag‘darilib ketgani to‘g‘risida xabar berilgandi.
