Toshkentda bir haftada 10 ming o‘rinli yotoq joy yaratiladi
Jahongir Ortiqxo‘jayev bo‘sh turgan tadbirkorlar binosini talabalar turarjoyiga aylantirish bo‘yicha taklif berdi.
Bugun, 9 sentabr kuni Toshkent shahar hokimligida shahar hokimi J.Ortiqxo‘jayev, sektor rahbarlari, Oliy va o‘rta maxsus ta’lim vaziri hamda poytaxtdagi oliy ta’lim muassasalari rektorlari ishtirokida yig‘ilish o‘tkazildi.
Unda talabalarni turarjoy bilan ta’minlash, ular uchun yotoq o‘rinlarini yaratish masalalari atroflicha muhokama qilingan.
Qayd etilishicha, ayni paytda Toshkent shahridagi oliy o‘quv yurtlarining 92 tasida yotoqxona quvvati 35636 o‘rinni tashkil etadi. Bugungi kunda 27354 nafar talabaning yotoq joy bo‘yicha ehtiyoji qondirilgan.
Yig‘ilishda vazirlik mas’ullari tomonidan ko‘rilayotgan bu kabi choralar yetarli emasligi, boshqa imkoniyatlarni ham izlab topish kerakligi ta’kidlanib, qator takliflar o‘rtaga tashlangan.
Shundan so‘ng J. Ortiqxo‘jayev poytaxtning Yangihayot tumanida bunyod etilgan "Tashkent indeks" savdo-ishlab chiqarish majmuasi hududida bo‘sh turgan 10 ming o‘rinli tadbirkorlar binosini bir hafta muddatda davlat xususiy sheriklik shartlari asosida talabalar uchun turarjoyga aylantirish taklifini bergan. Mazkur taklif yig‘ilish ishtirokchilari tomonidan munosib qarshi olingan.
Yig‘ilish so‘ngida oliy ta’lim muassasalari mas’ullariga zudlik bilan mavjud ehtiyoj bo‘yicha ma’lumotlarni shakllantirish vazifasi berilgan.
