BMT: “G‘alla kelishuvi"ga qaramay, ayrim davlatlarda mahsulotlar narxi o‘zgarmagan
Bunga sabab bo‘layotgan omillar ochiqlandi.
“G‘alla kelishuvi”ga qaramay, dunyoda oziq-ovqat mahsulotlarining ulgurji narxi pasaymadi. Bu haqda BMT butunjahon oziq-ovqat dasturining Yaqin Sharq va Shimoliy Afrika bo‘yicha mintaqaviy direktori Korin Fleysher maʼlum qildi.
“Ukraina portlari ochilishiga sabab bo‘lgan “g‘alla kelishuvi” butun dunyo uchun eng yaxshi xabar bo‘lgandi. Jahon bozorida narxlar pasaydi, ammo, afsuski, milliy valyutalarning kuchsizlanishi ortidan qator davlatlarda oziq-ovqat narxlari deyarli pasaymadi, chunki yetkazib beruvchilarning mahsulot import qilishi uchun dollar zarur”, – degan u Tokioda bo‘lib o‘tgan matbuot anjumanida.
Fleysherning so‘zlariga ko‘ra, portlarning qamalga olinishi eng ko‘p Shimoliy Afrika va Yaqin Sharqqa taʼsir o‘tkazdi, chunki ushbu mintaqalar Qora dengizga tutash va g‘alla importiga qaram hisoblanadi. Bu hududdagi hukumatlar aholini qo‘llab-quvvatlash dasturini kengaytira olmayapti. Butunjahon oziq-ovqat dasturi ham butun dunyodagi qashshoqlarga tarqatiladigan taomlar ratsionini qisqartirishga majbur bo‘lgan.
Bosh direktor Ukrainadan mahsulot eksporti ko‘payishiga, mineral o‘g‘itlarni yetkazib berish va narxlar barqarorlashuviga umid bildirgan.
Maʼlumot o‘rnida: 22 iyul kuni Rossiya, Ukraina, Turkiya va BMT g‘alla eksportini tiklash bo‘yicha to‘rt tomonlama kelishuvga erishdi. Istanbulda uning amalga oshirilishi yuzasidan koordinatsion markaz tuzilgan.
Avvalroq Erdog‘an Putin bilan oziq-ovqat mahsulotlari eksporti masalasida gaplashib olishini aytgandi.
