Chiroqchida pora olmagan IIB xodimi pul bilan mukofotlandi
Unga samarqandlik haydovchi tomonidan pora taklif qilingan.
Qashqadaryo viloyatining Chiroqchi tumanida fuqaro tomonidan taklif etilgan porani olmagan profilaktika inspektori pul mukofoti bilan taqdirlandi. Bu haqda viloyat IIB axborot xizmati xabar qildi.
Joriy yilning 10-iyun kuni Chiroqchi tuman IIB JXX HPB profilaktika inspektori Nurbek Oqnazarov tumanning tog‘li hududi bo‘lgan “Langar” MFYda xizmat olib borayotganda Samarqand viloyatiga tegishli “Niva” rusumli avtomashinaga duch keladi. U avtomashinani to‘xtatib, haydovchi bilan muloqotga kirishadi. Mehmon o‘zini B.P. deb tanishtirib, tegishli hujjatlari yo‘qligini aytadi.
Avtomashinada bo‘lgan ikki nafar voyaga yetmagan bola Chiroqchi tumani Xontepa qishlog‘ida yashovchi R.M. va A.S. ekanligini, ularni qishloq hududida o‘sadigan “Karrak” o‘simligini yig‘ish uchun yollaganini bildiradi.
Xodim avtomashinani tegishli hujjatlarsiz boshqarish va voyaga yetmagan shaxslarni majburiy mehnatga jalb qilish holatlari bo‘yicha hujjatlar rasmiylashtiradi.
Samarqand viloyati Nurobod tumanida yashovchi fuqaro B.P. profilaktika inspektoriga ishni o‘z foydasiga hal etish evaziga pora taklif qiladi. Katta leytenant unga bu ishi jinoyat ekanligini, agar niyatidan qaytmasa, qonuniy chora ko‘rilishi haqida ogohlantirsada, fuqaro unamaydi.
Natijada profilaktika inspektori bu haqda Chiroqchi tuman IIB boshlig‘i nomiga bildirgi bilan murojaat qiladi. Holat yuzasidan o‘tkazilgan tezkor tadbirda fuqaro B. P. profilaktika inspektori N. Oqnazarovning xizmat xonasida 5,5 mln so‘m pullarni pora tariqasida bergan vaqtida daliliy ashyolar bilan qo‘lga tushgan.
Chiroqchi tuman prokuraturasi tomonidan fuqaro B.P.ga nisbatan O‘zbekiston Respublikasi Jinoyat kodeksining 211-moddasi 1-qismi bilan jinoyat ishi qo‘zg‘atilgan.
“O‘z xizmat vazifasiga vijdonan yondashib, korrupsion holatni oldini olgani va fuqarolarda ichki ishlar organlariga bo‘lgan ishonchni mustahkamlagani uchun katta leytenant Nurbek Oqnazarov boshqarma rahbariyati tomonidan pul mukofoti bilan taqdirlandi”, — deyiladi xabarda.
