Denovda Toshkentga olib ketilayotgan sifatsiz go‘sht aniqlandi
Holat yuzasidan haydovchiga chora ko‘rilgan.
Surxondaryo viloyatining Denov tumanida avtomashinada olib ketilayotgan sifatsiz go‘sht mahsulotlari to‘xtatib qolindi. Bu haqda viloyat IIB axborot xizmati xabar qildi.
Boysun tumanidagi “Darband” YPX maskanida o‘tkazilgan reyd tadbirlari davomida “Denov–Toshkent” yo‘nalishida harakatlanib kelayotgan Denov tumanida yashovchi fuqaro A.SH boshqaruvidagi Cobalt rusumli avtomashina to‘xtatilib, uning yukxonasi tekshirilgan. Aniqlanishicha, haydovchi jami 182 kg yirik shoxli mol go‘shtini hech qanday veterinariya hujjatlarisiz Toshkent shahriga sotish uchun olib ketayotgan bo‘lgan.
Go‘sht mahsulotlari laboratoriya tekshiruvidan o‘tkazilganida uning iste’molga yaroqsizligi ma’lum bo‘lgan va Termiz hayvonot bog‘iga topshirilgan. Fuqaro A.SH.ga nisbatan O‘zbekiston Respublikasi Ma’muriy javobgarlik to‘g‘risidagi kodeksining 109-moddasi bilan ma’muriy bayonnoma rasmiylashtirilgan.
