Qozog‘istonda poyezd 100 boshdan ortiq qo‘yni urib ketdi
Chorva egasi javobgarlikka tortilgani aytilmoqda.
Qozog‘istonning Olmaota viloyatida yuk poyezdi 123 bosh qo‘yni urib yubordi.
Hodisa kecha, 12-sentabr kuni tungi soat 1 da viloyatning «Jetigen — Kurozek» yo‘lida sodir bo‘lgan. Bu haqda Huquq-tartibot xodimlari xabar berdi.
«Yuk poyezdi mashinisti temir yo‘lni kesib o‘tayotgan qo‘ylar suruvini payqab, shoshilinch tormozni bosgan va to‘qnashuvdan qochishga uringan. Lekin buning iloji bo‘lmagan, 530 bosh qo‘ydan 123 boshi nobud bo‘lgan. Poyezdning to‘xtashi 13 daqiqani tashkil qilgan», — degan transport politsiyasi boshqarmasi boshlig‘i.
Voqea joyiga Oltinko‘l stansiyasidagi Liney militsiya bo‘limi xodimlari jo‘nab ketgan. Huquq-tartibot idoralari xodimlari jonivorlarning egasi 36 yoshli erkak ekanini aniqlagan.
Erkak Maʼmuriy javobgarlik to‘g‘risidagi kodeksning 559-moddasi 1-qismi «Temir yo‘l yo‘lagida chorva mollarini o‘tlatish qoidalarini buzish» bilan maʼmuriy javobgarlikka tortildi.
