Andijonda maktab direktorlaridan 150 mingdan yig‘ilmoqda
Holatga XTB munosabat bildirdi.
Ijtimoiy tarmoqlarda Andijon shahar xalq ta’limi bo‘limi tomonidan sertifikat uchun 150 ming so‘mdan pul yig‘ilayotgani haqida xabarlar tarqaldi. Holat yuzasidan shahar XTB rasmiy munosabat bildirdi.
Ma’lum qilinishicha, viloyat XTBning 2022-yil 24-yanvardagi qarorida umumta’lim maktablarining direktor va o‘rinbosarlari malakasini oshirish uchun “Andijan Digital City” texnologik parki va Raqamli texnologiyalar o‘quv markazlarida imtiyozli va shartnoma asosida o‘quv kurslari tashkil etilishi belgilangan.
Ijtimoiy tarmoqlarda muhokamalarga sabab bo‘lgan audioyozuv Andijon shahar xalq ta’limi bo‘limi mudiriga tegishli ekanligi, audioyozuvda u tomonidan o‘quv kurslarida tahsil olayogan maktab rahbarlariga o‘quv kurslarini yakunlaganligi to‘g‘risidagi sertifikatlarni olishlari va kurslar uchun belgilangan mablag‘larni to‘lashlari zarur ekanligi ta’kidlangan.
Mazkur o‘quv-kurslari pullik ekanligi va belgilangan mablag‘ maktab rahbarlari uchun 3 baravar arzonlashtirilgan ekanligidan maktab direktorlari xabardor bo‘lgan.
“Andijon shahar xalq ta’limi bo‘limi Xalq ta’limi tizimini yanada rivojlantirish, maktab direktorlarini imiji va salohiyatlarini oshirish maqsadida amalga oshirilayotgan islohotlar asosida bajarilayotgan amaliy ishlarni noto‘g‘ri talqin etmaslikni so‘rab qoladi”, — deyiladi xabarda.
