"O‘zbek kinosini kelajakda dunyo miqyosidagi mashhurlik va eʼtirof kutmoqda"
"Ipak yo‘li durdonasi" XIV Toshkent xalqaro kinofestivali boshlanishi arafasida "O‘zbekfilm" ochiq pavilyonida tashkil etilgan tadbir davomida Butunrossiya davlat kinematografiya instituti rektori Vladimir Malishev so‘zga chiqdi.
Pavilyonda VGIK in Tashkent konsert dasturi hamda Sergey Gerasimov nomidagi Butunrossiya davlat kinematografiya institutining Toshkent filiali talabalari uchun bag‘ishlov marosimi bo‘lib o‘tdi, unda taniqli aktyor Sergey Bezrukov ham ishtirok etdi.
Tadbir davomida so‘zga chiqqan Butunrossiya davlat kinematografiya instituti rektori Vladimir Malishevning taʼkidlashicha, O‘zbekistonda institut filialining faoliyat olib borishi muhim ahamiyatga ega. Shuningdek, rektor filialda uchta yangi yo‘nalish ochilganini eʼlon qildi va yaqin kelajakda ushbu filial talabalari ham o‘zi haqida baland ovozda maʼlum qilishiga umid bildirdi.
Tadbirda, XIV Toshkent xalqaro kinofestivali bosh direktori, O‘zbekiston Kinematografiya agentligi rahbari Firdavs Abduxoliqov Butunrossiya davlat kinematografiya instituti (VGIK) filiali O‘zbekiston Prezidentining bevosita tashabbusi bilan ochilgani va ushbu taʼlim maskani institutning Rossiya tashqarisidagi yagona filiali ekanini taʼkidladi.
