Toshkentdagi moy bazada yong‘in chiqdi
Voqea joyiga 7 ta yong‘in-qutqaruv ekipaji yuborilgan.
Bugun, 17-sentabr kuni Toshkent shahrining Olmazor tumanidagi sexda yong‘in chiqdi. Holat yuzasidan Favqulodda vaziyatlar vazirligi Matbuot xizmati ma’lumot berdi.
Qayd etilishicha, soat 18:07 da Olmazor tumani “Qizg‘aldoq” ko‘chasida joylashgan moy ishlab chiqarish sexi hududida yong‘in sodir bo‘layotganligi to‘g‘risida shahar FVBga xabar kelib tushgan. Shunga asosan, 7 ta yong‘in-qutqaruv ekipaji soat 18:17 da voqea joyiga yuborilgan.
Shunga ko‘ra, yong‘in-qutqaruv ekipajlari soat 18:17 da voqea joyiga yetib borib, yong‘in soat 18:55 da o‘rab olingan va soat 18:58 da to‘liq o‘chirilgan. Uni bartaraf etishga 7 ta yong‘in-qutqaruv ekipaji, 1 ta ko‘pik hosil qiluvchi avtomobil, 2 ta avtonarvonlar jalb etilgan.
Hodisa oqibatida fuqarolarning tan jarohati olish va halok bo‘lish xolatlari to‘g‘risida xabar kelib tushmagan. Hozirda yong‘inning kelib chiqish sababi va keltirilgan moddiy zarar miqdori aniqlanmoqda.
