Namangandagi ariqda qonli suv oqmoqda
Holat yuzasidan FVB ma’lumot berdi.
Ijtimoiy tarmoqda Namangan shahridagi maktab va mahalla arig‘ida qonli suv oqayotgani haqida xabarlar tarqaldi. Holat yuzasidan viloyat Favqulodda vaziyatlar boshqarmasi rasmiy munosabat bildirdi.
O‘rganish davomida Yangi Namangan tumani “Ishonch” MFY “Gʻazina” ko‘chasida joylashgan kushxonadan chiqqan suv kanalizatsiya tarmog‘idan toshib, ko‘chadagi ariqqa quyilayotgani aniqlangan. Uni bartaraf etish yuzasidan IIB hamda FVB xodimlari tomonidan ishlar tashkillashtirilgan.
“Murojaat yuzasidan yuqoridagi holat to‘liq bartaraf etilgandan so‘ng qo‘shimcha ma’lumot taqdim etamiz”, — deyiladi xabarda.
