Shavkat Mirziyoyev islohotlarni jadallashtirish bo‘yicha yig‘ilish o‘tkazdi
Yig‘ilishda Strategik islohotlar agentligi faoliyatini yo‘lga qo‘yish masalalari muhokama qilingan.
Bugun, 20-sentabr kuni Prezident Shavkat Mirziyoyev islohotlarni yanada jadallashtirish va natijadorligini ta’minlash masalalari bo‘yicha yig‘ilish o‘tkazdi. Bu haqda Prezident matbuot xizmati xabar qildi.
Davlat rahbarining 9-sentabrdagi farmoni bilan O‘zbekiston Respublikasi Prezidenti huzuridagi Strategik islohotlar agentligi tashkil etilgandi. Yig‘ilishda mazkur Agentlik faoliyatini yo‘lga qo‘yish masalalari muhokama qilinib, ustuvor yo‘nalishlar ko‘rsatib o‘tildi.
“Islohotlar natijasida ijobiy o‘zgarish bo‘lishi, odamlar buni o‘z hayotida sezishi kerak. Agentlik buning uchun ustuvor islohotlarni aniqlaydigan, ularni o‘zaro muvofiqlashtiradigan va natijadorlikni ta’minlaydigan tuzilmaga aylanishi lozim”, – dedi Prezident.
Yig‘ilishda shu boradagi asosiy vazifalarga to‘xtalib o‘tildi. Alohida soha va tarmoqlarni isloh qilish bo‘yicha takliflar ishlab chiqish, islohotlarning ustuvorligi va mantiqiy ketma-ketligini belgilash, davlat dasturlari ijrosini monitoring qilish, tizimli muammolarni aniqlash va tegishli choralar ko‘rish shunday muhim vazifalardan hisoblanadi.
Masalan, tahlillar qishloq va suv xo‘jaligi, yer munosabatlari, iqtisodiyotda davlat ulushini qisqartirish, transport, kommunal xo‘jaligi, tibbiyot kabi sohalarda qo‘yilgan maqsadlarga erishilmaganini ko‘rsatmoqda. Strategik islohotlar agentligi bunday muammolarni tanqidiy tahlil qilib, ishni jadallashtirish bo‘yicha aniq chora-tadbirlar belgilaydi.
Ish o‘rinlari ko‘payishi va aholi daromadlari o‘sishi uchun iqtisodiyotning ustuvor tarmoqlarini aniqlash ham juda muhim.
Shu bois davlat rahbari aholining barcha qatlamlariga ijobiy ta’sir qiladigan islohotlarni aniqlab, “yo‘l xaritasi” ishlab chiqish bo‘yicha ko‘rsatma berdi. Bunda aholidan eng ko‘p murojaat bo‘layotgan sohalarga e’tibor qaratish, ular bo‘yicha nimaga erishilishi va xalq nima manfaat ko‘rishini aniq ko‘rsatish zarurligini ta’kidladi.
Ustuvor sohalarni isloh qilish va muvofiqlashtirish bo‘yicha vazirlik va idoralarning malakali mutaxassislari hamda xalqaro ekspertlardan iborat Loyiha guruhlarini shakllantirish vazifasi qo‘yildi.
