Farg‘onada elektromobil ishlab chiqarish yo‘lga qo‘yiladi
Shuningdek, elektromobillar uchun kuzov, zaryad stansiyasi, akkumulyator ehtiyot qismlari mahalliylashtiriladi.
Farg‘onadagi “Central Asia Motors” korxonasi negizida elektromobillar ishlab chiqarish yo‘lga qo‘yiladi. Bu haqda viloyat hokimligi matbuot xizmati xabar berdi.
Qayd etilishicha, viloyat hokimi Xayrullo Bozorov elektromobillar uchun ehtiyot qismlarni ishlab chiqarishni o‘zlashtirish hamda yengil va yuk elektromobillarini ishlab chiqarish loyihasi bo‘yicha qilingan ishlarni ko‘zdan kechirgan.
Korxonada, shuningdek, elektromobillar uchun kuzov, quvvatlash stansiyasi, akkumulyator ehtiyot qismlari ishlab chiqarilishi mahalliylashtiriladi.
Loyihaning umumiy qiymati 50 million dollarga baholanmoqda. Shundan 40 million dollarni to‘g‘ridan-to‘g‘ri xorijiy investisiyalar tashkil etadi. Yiliga 10 ming dona avtomobil ishlab chiqarish, uning 40 foizini eksportga yo‘naltirish rejalashtirilmoqda.
Tadbirkor viloyat rahbariga elektromobillar ishlab chiqarish jarayonlari joriy yil yakuniga qadar boshlanishini ma’lum qilgan.
