Qirg‘iziston va Tojikiston chegara postlarini olib tashlashga kelishib oldi
Bugun ertalab tomonlar mojarolarni tugatish bo‘yicha protokol imzolagandi.
Qirg‘iziston va Tojikiston mojarolar yuz bergan chegara hududlarda har tomondan to‘rttadan postni olib tashlashga kelishib oldi. Bu haqda Qirg‘iziston Milliy xavfsizlik davlat qo‘mitasi raisi Qamchibek Tashiyev ma’lum qildi.
Shuningdek, muzokaralar chog‘ida tomonlar qirg‘iz-tojik chegarasini delimitatsiya va demarkatsiya qilish bo‘yicha ishlarni tezlashtirishga kelishib olgan.
Eslatib o‘tamiz, Qirg‘iziston va Tojikiston chegarasida yirik to‘qnashuvlar 16-sentyabr kuni ertalab boshlangandi. Tomonlar bir-birini o‘q uzganlikda aybladi. Qirg‘iziston tomoni to‘qnashuvlar natijasida 62 nafar o‘z fuqarolari halok bo‘lgani va 198 nafari yaralanganini ma’lum qilgan. Tojikistonda esa 41 kishi halok bo‘lgan, 30 kishi yaralangan.
