Toshkentdagi parfumeriya do‘konida yuz bergan yong‘in qasddan uyushtirilgani ma’lum bo‘ldi
Qashqadaryolik erkak do‘konga nima maqsadda o‘t qo‘yganini aytib berdi.
Avvalroq Toshkent shahrining Yashnobod tumanidagi do‘konlardan birida katta yong‘in sodir bo‘lgani haqida xabar berilgandi. Holat yuzasidan shahar IIBB qo‘shimcha ma’lumot e’lon qildi.
Ma’lum bo‘lishicha, olov elektr yoki gazdan kelib chiqmagan. Qo‘shni do‘konlarning kuzatuv kamerasidagi tasvirlarga ko‘ra, tun yarmida qora kepka va maskada kelgan shaxs do‘kon eshigini sindirib, yonuvchi moddani sepib, do‘konni yoqib ketgani aks etgan.
Surishtiruv harakatlati davomida ushbu jinoyatni 1991-yilda Qashqadaryo viloyatida tug‘ilgan, muqaddam bir necha marotaba jinoyat sodir etib sudlangan Nuriddin ismli shaxs sodir etgani aniqlangan.
“Do‘kon oynasini yoqib, qo‘rqitib qo‘ymoqchi edim, katta yong‘in bo‘lib ketdi”, — deydi qashqadaryolik erkak.
Qasddan sodir etilgan yong‘in tufayli do‘kon egalariga 4 mlrd so‘mga yaqin zarar yetkazilgan. Ushbu holat yuzasidan hozirda tergov harakatlari davom etmoqda.
