Eron Rossiyaga dronlar yetkazib berayotganini inkor qildi
Mamlakat TIV rahbari Tehronning har qanday qurolli mojaroga qarshi ekanini aytgan.
Eron Ukraina mojarosi tomonlariga qurol yetkazib berilishiga qatʼiyan qarshi. Bu haqda mamlakat tashqi ishlar vaziri Husayn Amir Abdulloxiyan maʼlum qildi.
Diplomat Eron Rossiyaga uchuvchisiz qurilmalar yetkazib beryaptimi, degan savolga “Bizda Rossiya bilan mudofaa sohasidagi kelishuv bor, ammo Ukraina mojarosidagi hech qaysi tomonni qo‘llab-quvvatlamaymiz. Chunki bu nizoning cho‘zilishiga olib keladi. Biz har qanday urushga qatʼiyan qarshimiz. Shu sababli Ukrainada o‘t ochishni to‘xtatish hamda tinchlikni taʼminlanishiga harakat qilyapmiz”, – deb javob bergan.
Avgustda qator G‘arb nashrlari Moskva Tehrondan uchuvchisiz qurilmalar sotib olayotganini yozgandi. Bu kabi bayonotlar AQSH rasmiylari tomonidan ham berilgan. O‘z navbatida Rossiya tomoni ushbu maʼlumotlarni inkor qilgan.
Shu bilan birga so‘nggi haftalarda RF tomonidan Ukrainaning qator shaharlariga uyushtirilgan dronlar hujumida Eron qurilmalaridan foydalanish holatlari kuzatilgani aytilmoqda. Shu munosabat bilan Kiyev Eron bilan diplomatik munosabatlar maqomini pasaytirdi.
Avvalroq SHHT sammiti doirasida Eron va Rossiya prezidentlari uchrashgandi.
