Erdog‘an: Putin nimani rejalashtirsa, amalga oshiradi
Turkiya prezidenti Ukraina sharqida o‘tkazilgan “referendumlar” masalasida xavotir bildirdi.
Turkiya prezidenti Rajab Toyyib Erdog‘an Putin nimani o‘ylasa, shuni amalga oshirishini maʼlum qildi.
Ukraina sharqida o‘tkazilgan “referendumlar” haqida gapirar ekan, Turkiya rahbari bu hududlarning Rossiyaga qo‘shib olinishidan xavotir bildirdi.
“Bu sodir bo‘lishi mumkin, chunki men bilgan janob Putin nimanidir rejalashtirsa, uni albatta amalga oshiradi”, – degan u.
Erdog‘an payshanba kuni Putin bilan telefon muloqotini o‘tkazishini va muzokaralarda ushbu masalani ko‘tarishini taʼkidlagan.
Maʼlumot o‘rnida: “DXR”, “LXR”, Zaporojye va Xerson viloyatlarining RF tomonidan egallab olingan hududlarida 23-27 sentyabr kunlari Rossiyaga qo‘shilish masalasida “referendumlar” o‘tkazildi. Ularning barchasi Moskva bilan “birlashib” ketishga rozilik bildirgan.
Shu munosabat bilan bu to‘rt hududdagi rossiyaparast maʼmuriyat vakillari Putin bilan uchrashish niyatida Rossiyaga uchib kelgan.
Avvalroq Rossiya prezidenti Erog‘an bilan Samarqandda Ukraina bilan muzokaralar o‘tkazishga tayyorligini bildirgani to‘g‘risida xabar berilgandi.
