Toshkentda 3 kishi IIB xodimlari tomonidan majburiy olib ketildi
Holat yuzasidan shahar IIBB rasmiy izoh bedi.
Ijtimoiy tarmoqda Toshkent shahrining Chilonzor tumanida bir nechta fuqarolarni sport zalidan olib chiqib ketishgani haqidagi xabarlar tarqaldi. Holat yuzasidan shahar IIBB rasmiy munosabat bildirdi.
Ma’lum qilinishicha, Chilonzor tumani IIO FMB tergov bo‘limi ish yurituvida fuqaro A.A.ga nisbatan Jinoyat kodeksining 244-2-moddasi (“Diniy ekstremistik, separatistik, fundamentalistik yoki boshqa taqiqlangan tashkilotlar tuzish, ularga rahbarlik qilish, ularda ishtirok etish”) alomatlari bilan qo‘zg‘atilgan jinoyat ishi tergov qilinmoqda.
Mazkur fuqaro xalqaro terroristik tashkilotlarga qo‘shilish maqsadida O‘zbekiston hududidan chiqib ketayotgan vaqtida qo‘lga olingan. Mazkur jinoyat ishi doirasida gumonlanuvchining jinoiy sheriklarini aniqlash maqsadida bir nechta fuqarolar tergov idoralariga chaqirtirilgan, biroq ayrim fuqarolar uzrli sabablarsiz tergov organlariga kelishdan bosh tortganligi sababli, ular hududiy tuman IIO FMBga majburiy tartibda olib kelingan.
Ayrim fuqarolar Chilonzor tumanidagi sport zallarda bo‘lishgan va tuman IIO FMBga olib borilgan. Keltirilgan har bir fuqaro bilan suhbat o‘tkazilib, jinoyat ishiga aloqador bo‘lmagan fuqarolar qo‘yib yuborilgan. 3 nafar fuqaroga nisbatan jinoyat ishi doirasida qamoqqa olish ehtiyot chorasi qo‘llangan.
