Quvaytdan Namanganga parvozlar yo‘lga qo‘yildi
Muntazam reyslar haftasiga 3 marta amalga oshirildi.
“Jazeera Airways” aviakompaniyasi Quvaytdan Namanganga parvozlarni yo‘lga qo‘ydi, deya xabar bermoqda “Uzbekistan airports”.
Bugun, 1-oktyabr kuni mahalliy vaqt bilan soat 6:32 da Quvaytning “Jazeera Airways” aviakompaniyasining samolyoti Namanganga kelib qo‘ndi. O‘zbekistonga El-Quvayt–Namangan–El-Quvayt, yangi parvoz yo‘nalishini ochgan “Airbus–A321” borti an’anaviy tarzda suv arkasi bilan tantanali ravishda kutib olindi.
Muntazam reyslar haftasiga uch marta – seshanba, payshanba va shanba kunlari amalga oshirilishi rejalashtirilgan.
Eslatib o‘tamiz, 2021-yil bahoridan beri “Jazeera Airways” Quvayt–Toshkent–Quvayt yo‘nalishi bo‘yicha haftasiga ikki marta: chorshanba va shanba kunlari charter va muntazam reyslarni muvaffaqiyatli amalga oshirib kelmoqda.
“Jazeera Airways” Quvaytning ikkinchi milliy aviakompaniyasi bo‘lib, shtab-kvartirasi o‘z terminaliga ega xalqaro ayeroportda joylashgan va arzon narxlardagi havo sayohatlariga ixtisoslashgan.
