Toshkentda hokimlik ishchisi fuqaroni 30 ming dollarga “uxlatdi”
Hozirda unga nisbatan jinoyat ishi qo‘zg‘atilgan.
Toshkent shahrining Yunusobod tuman hokimligida bo‘lim boshlig‘i lavozimida ishlagan sobiq xodimga firibgarlik bo‘yicha jinoyat ishi qo‘zg‘atildi. Bu haqda Bosh prokuratura matbuot kotibi Hayot Shamsutdinov xabar qilmoqda.
Qayd etilishicha, hokimlikning uy-joy kommunal xizmat ko‘rsatish va obodonlashtirish masalalari bo‘yicha bo‘lim sobiq boshlig‘i ikki nafar jinoiy sherigi bilan bir fuqaroga avtosalondan yangi “Malibu” rusumli avtomashinani olib berishni va’da qilib, evaziga 30 000 AQSH dollari miqdoridagi pullarni qo‘lga kiritgan va o‘z ehtiyojlariga sarflab yuborgan.
Mazkur holat yuzasidan Yunusobod tuman prokuraturasi tomonidan Jinoyat kodeksining 168-moddasi 4-qismi “a” bandi bilan jinoyat ishi qo‘zg‘atilgan.
Jinoyat ishi doirasida 2 nafar shaxsga nisbatan “qamoqqa olish” ehtiyot chorasi qo‘llanilgan. 1 nafari esa tergovdan yashiringanligi sababli qidiruv e’lon qilingan. Hozirda tergov harakatlari olib borilmoqda.
