Bayden Tehronga qarshi yangi sanksiyalar joriy etmoqchi
Bunga Erondagi namoyishlar sabab qilib ko‘rsatilgan.
AQSH shu haftada bir qator Eron amaldorlariga qarshi sanksiya joriy etadi. Bu haqda Jozef Bayden maʼlum qildi.
“Men Erondagi namoyishlarning bostirilishidan xavotirdaman. Xususan, ayollar va talabalarga zo‘ravonlik ishlatilmoqda...”, – degan Oq uy rahbari.
AQSH prezidenti eronliklarning internetga kirishini tashqi xavfsiz vositalar orqali taʼminlanishi, bir qator tashkilot va rasmiy shaxslarga cheklovlar qo‘yilishini aytgan. Ular orasida “axloq politsiyasi” ham bor.
Sentyabrda AQSH Eronning “axloq politsiyasi”ga qarshi sanksiya joriy etgandi. Bundan tashqari, Tehronga kommunikatsion xizmatlar ko‘rsatilishini kengaytiradigan bosh litsenziya taqdim etildi. Amerika rasmiylari buni “Eron xalqini axborot olish va axborot almashish erkinligini qo‘llab-quvvatlash maqsadida” amalga oshirilganini qayd etgan.
Avvalroq Eron prezidenti AQSH sanksiyalari cheklovlar ostidagi davlatlarni mustahkamlayotganini aytgandi.
