Toshkentda avariya sabab gaz ta’minoti to‘xtatildi
Hozirda ta’mirlash ishlari olib borilmoqda.
Toshkent shahrining Mirzo Ulug‘bek va Shayxontohur tumanlarida gaz ta’minoti vaqtincha to‘xtatildi. Bu haqda “Hududgaz poytaxt” xabar qildi.
Qayd etilishicha, Mirzo Ulug‘bek tumani M. Gandi ko‘chasida Elektr tarmoqlari korxonasi ish olib borayotgan vaqtda o‘rta bosimli gaz quvuriga shikast yetgan. Natijada kuchli gaz sizib chiqish holati yuzaga kelgan. Shu sababli 4-oktyabr kuni soat 21:05 da Darxon massivida 25 ta ko‘p qavatli uylardagi 1500 ta xonadonlarda, M. Gandi ko‘chasidagi 80 ta hovli xonadonlarda, “Asaka” ko‘chasidagi 60 ta hovli xonadonlarda hamda 16 ta ulgurji tashkilotlarda gaz ta’minoti 5-oktyabr kuni soat 09:00 ga qadar vaqtinchalik to‘xtatilgan.
Shayxontohur tumani “Uch lola” ko‘chasida yo‘l qurilish xodimlari ishlayotgan vaqtda gaz quvurida avariya sodir bo‘lganligi tufayli 4-oktyabr kuni soat 20:00 da “Nurafshon” shoh ko‘chasi hamda Mujurmon Obid ko‘chalari kesishmasida joylashgan “Makro” supermarketida gaz ta’minoti vaqtinchalik to‘xtatildi. Shuningdek, Olimxodjayev, “Samarqand darvoza” mahallalarida gaz bosimi pasaygan. Hozirda ta’mirlash ishlari olib borilmoqda. Avariya bartaraf etilgach gaz ta’minoti qayta tiklanadi.
