Qashqadaryoda elektr tarmoqlari korxonasi xodimi tok urishi oqibatida vafot etdi
Hozirda voqea sabablari o‘rganilmoqda.
Kecha, 5-oktyabr kuni Qashqadaryo viloyati Gʻuzor tumani elektr tarmoqlari korxonasi xodimi tok urishi oqibatida vafot etdi. Bu haqda “Nasafnews” nashri xabar qilmoqda.
Ma’lum bo‘lishicha, 1972-yilda tug‘ilgan marhum xodim hamkasblari bilan “Gʻuzor-Sovbog” fiderining “Mikop” shоxobchasini avariyadan keyin ko‘rikdan o‘tkazishgan. Shu kuni soat 14:30 larda fiderga kuchlanish berilgan.
Soat 15:30 larda iste’molchi bilan kelishgan holda brigada o‘zboshimchalik bilan “Oxunboboyev” fiderining 36-tayanchidan iste’molchi tayanchiga o‘tadigan simlarni yechish vaqtida elektrchi Gʻ.B kuchlanish ostida qolgan.
Boshqa xodimlar jabrlanuvchi Gʻ.B.ni tayanchdan tushirib, birinchi yordam ko‘rsatishgan va tez yordam chaqirishgan. Ammo xodim voqea joyida halok bo‘lgan.
