Farg‘onada jinoyat ishini yopib beruvchi shaxslar ushlandi
Ular fuqaroni qamoqdan chiqarish uchun 10 ming dollar so‘rashgan.
Farg‘ona viloyatida Jinoyat ishini ijobiy hal qilib berish evaziga fuqarodan 10 ming AQSH dollari miqdoridagi pullarni pora tariqasida qo‘lga kiritmoqchi bo‘lgan shaxslar ushlandi. Bu haqda viloyat IIB axborot xizmati xabar qildi.
Qayd etilishicha, 5-oktyabr kuni fuqaro D.Q. hamda M.J.lar oldindan til biriktirib, fuqaro D.E.ning tergov organi tomonidan ayblanib qamoqqa olingan tanishi T.R.ni huquqni muhofaza qiluvchi organlarda ishlovchi mansabdor shaxslar orqali qamoqdan chiqarib, jinoyat ishini ijobiy hal qilib berishlari evaziga undan 10 000 AQSH dollari talab qilishgan.
O‘tkazgan tezkor tadbir davomida yuqoridagi shaxslar Qo‘qon shahrining “Turkiston” ko‘chasida arizachidan 10 ming AQSH dollari miqdoridagi pullarni olgan vaqtda ashyoviy dalillar bilan ushlangan. Mazkur holat yuzasidan D.Q va M.J.larga nisbatan Jinoyat kodeksining 25, 168-moddasi 3-qismi “a” bandi va 28, 211-moddasi 2-qismi “b” bandi bilan jinoyat ishi qo‘zg‘atilib, qamoqqa olish tarzidagi ehtiyot chorasi qo‘llanilgan.
Shuningdek, muqaddam sudlangan fuqaro D.Q. 3 nafar fuqarolardan jarima maydonidagi avtomashinani chiqarish, haydovchilik guvohnomasi olib berish va boshqa harakatlar uchun ham pul olganligi yuzasidan arizalar kelib tushgan.
Hozirda tergov harakatlari olib borilmoqda.
