OPEC+ kelishuvi AQSHga qaratilganmi? So‘z saudiyaliklarga
5-oktyabr kuni OPEC+ davlatlari neft qazib olishni qisqartirishga kelishib olgandi.
Ar-Riyod neftdan qurol sifatida foydalanmayapti. Bu haqda Saudiya Arabistoni tashqi ishlar davlat vaziri Odil al-Jubayr maʼlum qildi.
Diplomat OPEC+ aʼzolarining neft qazib olishni qisqartirishga doir kelishuvi AQSHga qarshi qaratilmaganini taʼkidlagan.
“Neft qurol emas. U qiruvchi vosita emas. U tank emas. Undan otib bo‘lmaydi. Biz neftni tovar va dunyo iqtisodiyotining muhim qismi sifatida ko‘ramiz. Saudiya Arabistoni buni AQSHga qarshi amalga oshirayotgani yoki neftdan siyosiy maqsadlarda foydalanayotgani to‘g‘risidagi fikrlar mutlaqo noto‘g‘ri”, – degan vazir Fox News‘ga bergan intervyusida.
Al-Jubayr neft qazib olishni qisqartirish energetika bozorining butunlay qulamasligi uchun chora ekanini qayd etgan. Uning so‘zlariga ko‘ra, Saudiya Arabistoni neft bozorida barqarorlik saqlanib qolishi tarafdori.
5 oktyabr kuni OPEC+ davlatlari “qora oltin” qazib olishni sutkasiga 2 million barrel qisqartirishga kelishib oldi. Bu AQSHning keskin noroziligiga sabab bo‘ldi.
