O‘zbekistonda qancha monopol korxona bor?
Monopoliyaga qarshi kurashish qo‘mitasi bu bo‘yicha maʼlumot berdi.
So‘nggi ikki yilda davlat ishtirokidagi korxonalar soni 30 foizga kamaydi. Bu haqda Monopoliyaga qarshi kurashish qo‘mitasi raisi o‘rinbosari Farrux Karabayev maʼlum qildi.
Uning so‘zlariga ko‘ra, 2021-2022 yillar davomida davlat ishtirokidagi korxonalarni tashkil etish bo‘yicha jami 45 ta murojaatning 33 foizi Qo‘mita tomonidan rad etilgan. Bundan tashqari, davlat ishtirokidagi korxonalarga asosiy faoliyatidan xos bo‘lmagan qo‘shimcha faoliyat bilan shug‘ullanish va boshqa korxonalarda ulushga ega bo‘lishi taqiqlanishi natijasida davlat ishtirokidagi korxonalar soni so‘nggi ikki yilda qariyb 3000 dan 2100 tagacha qisqardi.
Umuman olganda, monopol korxonalarning umumiy miqdori oxirgi 5 yilda 20 foizga kamaygan va ularning soni 90 tani tashkil etmoqda.
Bundan tashqari, raqobatga taʼsiri baholangan mingdan ortiq normativ-huquqiy hujjatlar loyihalarining deyarli 65 foizida raqobatga zid normalar borligi aniqlangan.
