Tanqidlar ostida qolgan Ilon Maskning sunʼiy yo‘ldoshlari Ukrainada ishlamay qoldi
Milliarder so‘nggi kunlarda ukrainalik amaldorlar g‘azabiga duchor bo‘lgandi.
So‘nggi haftalarda Ukraina armiyasi Starlink sunʼiy yo‘ldosh tizimlaridan foydalanishda muammolarga duch kelgan. Bu haqda Financial Times gazetasi xabar berdi.
Gazetaning Ukraina oliy qo‘mondonligidagi manbalari bu ayrim vaziyatlarda halokatli oqibatlarga olib kelganini maʼlum qilgan. Ukrainaliklar Ilon Maskka tegishli yo‘ldoshlardan kommunikatsiyaning boshqa vositalari cheklab qo‘yilgan hududlarda muloqot va razvedka maʼlumotlarini almashishda foydalanadi. Starlink maxsus dronlar yordamida signallarni qabul qiladi.
Ukraina mudofaa vaziri Aleksey Reznikov holatga izoh berishdan bosh tortgan. Maskning o‘zi FT jurnalistlarini noto‘g‘ri maʼlumotlar tarqatishda ayblagan. Shu bilan birga u frontdagi maxfiy maʼlumotlarni bahona qilib, vaziyatni izohlamagan.
Shuni qayd etish lozimki, so‘nggi kunlarda Ilon Mask Ukrainada tinchlik o‘rnatilishi uchun o‘z kelishuv variantini taqdim etdi. U Qrimni Rossiya ixtiyorida qoldirish, sharqiy hududlarda qayta referendumlar o‘tkazishni taklif qilgandi. Ammo bu ukrainaliklarning keskin noroziligiga sabab bo‘ldi. Yakunda milliarder Ukrainani yaxshi ko‘rishini, ammo Uchinchi Jahon urushi boshlanmasligi tarafdori ekanini maʼlum qildi.
