Bankrotga uchradik, oilam ham barbod bo‘ldi—Farruh Raimov
Dilso‘zning turmush o‘rtog‘i Prezidentga murojaat yo‘lladi.
Xonanda Farruh Raimov oilasi barbod bo‘lganini aytib, prezidentdan yordam so‘radi. Bu haqda u o‘zining ijtimoiy tarmoqdagi sahifasida videomurojaat e’lon qildi, deya yozmoqda “Darakchi.uz” nashri.
“Yurtimizda 10-15 yildan beri bayram tadbirlarida oilaviy xizmat qilamiz. Orttirgan pulimizga yashash uchun joy sotib olgan edik. O‘sha yerni o‘zidan-o‘zi “ko‘tarib” bo‘lmaydi. O‘sha vaqt mablag‘imiz yetarli emas edi.
Bu yerni sotib, birinchi biznesimiz, ya’ni tadbirkorlik bilan shug‘ullanib ko‘raylik degan maqsadda texnik ko‘rik ochishni rejalashtirdik. Davlat akkreditasiya markazidan 4 oy davomida imtihondan o‘tib, endi ruxsatnoma olib, ishni boshlaymiz deganimizda texnik ko‘rikning ba’zi shartlari o‘zgardi. Bizning ishimiz to‘xtab, bankrotga uchradik”, — deydi Raimov.
Xonandaning so‘zlariga ko‘ra, mazkur muammo oilasining buzilishiga ham sabab bo‘ldi.
“Sarflagan pullarimizning hammasi havoga uchib ketdi. Shundan ozgina vaqt o‘tgandan keyin oilaviy kelishmovchiliklar kelib chiqdi. 4 nafar farzandim bor. Oilam ham barbod bo‘ldi, shu sababli videomurojaat yo‘llashga majbur bo‘ldim”, — deydi u.
