Talaba qizlarning kvartiradan haydalgani aks etgan video yolg‘on bo‘lib chiqdi
Holat yuzasidan O‘zJOKU rasmiy munosabat bildirdi.
Ijtimoiy tarmoqda Toshkent shahridagi kvartiralardan birida ijarachi talaba qizlar uy egasi tomonidan haydalgani aks etgan videolavha tarqaldi. Holat yuzasidan O‘zbekiston jurnalistika va ommaviy kommunikasiyalar universiteti rasmiy munosabat bildirdi.
Qayd etilishicha, 10-oktyabr sanasiga o‘tar kechasi universitetning Xalqaro va audiovizual jurnalistika fakultetining 1-bosqich talabasi — 1996-yilda tug‘ilgan Jumaboyev Husniddin Shuhratbek o‘g‘li o‘zining “GLOBAL TV” (YouTube, Instagram, Tiktok) sahifalarida ijara uylarning narxi ko‘tarilishi yuzasidan sahnalashtirilgan video yuklagan.
Ushbu videoda uy egasi qizlarni uyidan chiqib ketishi va ularning o‘rniga 600 AQSH dollariga ijarachi kutib turganligini aytgan.
Sahnalashtirilgan video kontentni tayyorlash g‘oyasi Kun.uz internet nashrida e’lon qilingan “Xavf ostida yashayotgan ijaradagi qizlar” maqolasidan keyin tug‘ilgan.
Ma’lum bo‘lishicha, ushbu video lavha bir yarim soatdan keyin tarmoqlardan olib tashlangan. Ammo qisqa vaqt davomida ayrim telegram kanallarida tarqagan ushbu videoga nisbatan o‘zgacha tus berilgan.
Aniqlanishicha, bu video Husniddin Jumaboyevning Toshkent shahrining Chilonzor tumanida joylashgan xolasining uyida olingan bo‘lib, undagi ishtirokchilar o‘zining kursdoshlari.
“Videolavha sahnalashtirishda ishtirok etgan talabalar bu kabi holatga duch kelgan jabrlanuvchilar emasligini rasman ma’lum qilamiz”, — deyiladi xabarda.
