Lavrov Ukraina bilan muzokaralarning buzilishida AQSHni ayblab chiqdi
Diplomat Rossiya hech qachon Kiyev bilan muloqot so‘ramaganini iddao qildi.
Rossiya tashqi ishlar vaziri Sergey Lavrov AQSHni Moskva-Kiyev muzokaralarini buzishda aybladi. Uning so‘zlariga ko‘ra, tomonlar mart oyida Istanbulda kelishuvga yaqin turgan.
“Biz mart oxirida Ukraina delegatsiyasi bilan muzokaralar stolida o‘tirgandik, Istanbulda ushbu vaziyatni hal etishning ... yo‘nalishlari tasdiqlangandi va bu bizga o‘sha paytda maʼqul tushgandi”, degan diplomat.
Shu bilan birga vazir Ukraina tomoni qanday shartlar qo‘yganini ochiqlamagan. Uning fikricha, AQSH va Buyuk Britaniya muloqot jarayonining to‘xtab qolishiga asosiy aybdor hisoblanadi.
Lavrov Rossiya tomoni hech qachon muzokaralarni talab qilmaganini taʼkidlagan.
“Istanbuldagi muzokaralar raundi Ukraina iltimosi bilan boshlangandi. Biz ijobiy javob berdik”, – deb qayd etgan u.
Maʼlumot o‘rnida: Rossiya-Ukraina muzokaralari 29 mart kuni Istanbulda bo‘lib o‘tgandi.
Avvalroq Vladimir Zelenskiy Moskvani ultimatumlar orqali muloqot qilishda ayblagan va shu sababli muzokaradan bosh tortgandi.
