Samarqandda oziq-ovqat xavfsizligi bo‘yicha xalqaro anjuman bo‘lib o‘tdi
Unda 30 nafar xorijiy ekspertlar qatnashdi.
14-15-oktyabr kunlari Samarqand shahrida BMTning Oziq-ovqat va qishloq xo‘jaligi tashkiloti (FAO) va Qurg‘oqchil mintaqalarda qishloq xo‘jaligi tadqiqotlari xalqaro markazi (ICARDA) ko‘magida “Oziq-ovqat xavfsizligi: Global va milliy muammolar” mavzusida IV xalqaro ilmiy-amaliy anjuman bo‘lib o‘tdi.
Yirik ilmiy forum Butunjahon oziq-ovqat kuniga bag‘ishlandi. 16 oktyabr global hamjamiyatni oziq-ovqat xavfsizligiga erishish va dunyodagi ochlikni yo‘q qilish uchun birgalikda ishlashga va barcha uchun yaxshiroq, barqaror kelajakni yaratishga chaqiradi.
Ajumanda Germaniya, Qozog‘iston, Pokiston, Rossiya, AQSH va Tojikistondan 30 nafar soha vakillari, shuningdek, 240 dan ortiq mahalliy mutaxassis va olimlar ishtirok etdi. Ishtirokchilar tomonidan qizg‘in muhokamalar bilan kechgan ma’ruzalar va taqdimotlar qilindi, ko‘plab qiziqarli g‘oya va fikrlar bildirildi, yorqin faktlar va ilmiy izlanishlarning yangi natijalari taqdim etildi.
Jumladan, Vashington universiteti professori Tomas Lampkin (AQSH) “Iqlim o‘zgarishi va agroekotizimlarning mahsuldorligi” mavzusida, Qaid-i Azam Universiteti professori Muhammad Zafar (Pokiston) “Yovvoyi mevalarning parhez birikmalarini tahlil qilish va ularning oziq-ovqat xavfsizligi va barqarorligiga qo‘shgan hissasi” mavzusida ma’ruza qildi. O‘z navbatida, Sankt-Peterburg biotexnologiya va oziq-ovqat ishlab chiqarish Oliy maktabi direktori Yuliya Bazarnova (Rossiya) “Oziq-ovqat xavfsizligi sohasidagi yangi ta’lim texnologiyalari” haqida gapirdi.
Konferensiya “Koronavirus pandemiyasi davrida O‘zbekiston va jahonda oziq-ovqat xavfsizligini ta’minlash Konsepsiyasini amalga oshirishning muhim masalalari va muammolari”, “Noqulay mintaqalarda tabiiy resurslardan barqaror foydalanishning ustuvor yo‘nalishlari”, “Oziq-ovqat xavfsizligini ta’minlashda zamonaviy bio- va agrotexnologiyalardan foydalanishning ahamiyati”, “Ovqatlanish sohasidagi zamonaviy tadqiqotlar” va “Oziq-ovqat xavfsizligini ta’minlashda fan, ta’lim va ishlab chiqarishning integrasiyasi” kabi yo‘nalishlarda ish olib bordi.
