Britaniya yana Bosh vazirga yolchimadimi?
Saylanganiga hali 2 oy bo‘lmagan Trassdan o‘rnini bo‘shatib qo‘yishni talab qlishmoqda.
Konservativ partiyaning aksariyat a’zolari Buyuk Britaniya Bosh vaziri Liz Trass iste’foga chiqishi kerak, deb hisoblaydi. So‘rovnomaga ko‘ra, fuqarolarning uchdan bir qismi Boris Jonsonning qaytishini xohlaydi.
“RiaNovosti” nashrining yozishicha, Britaniya jamiyatida Trassni qo‘llab-quvvatlash darajasi uning muvaffaqiyasiz iqtisodiy siyosati tufayli 10 foizgacha tushib ketdi.
Konservativlar partiyasi a’zolari o‘rtasida o‘tkazilgan yangi tezkor so‘rov shuni ko‘rsatdiki, ularning 55 foizi bosh vazirning iste’fosini xohlaydi. Ularning atigi 38 foizi Trassning o‘z lavozimida qolishini istaydi.
Britaniya allaqachon uning o‘rniga nomzod qidirmoqda. Respondentlarning har uchinchisi (32 foizi) Boris Jonsonning Bosh vazir lavozimiga qaytishini istaydi. Shu bilan birga, 23 foizi sobiq moliya vaziri Rishi Sunak, 10 foizi esa mudofaa vaziri Ben Uollesning tayinlanishini istaydi.
So‘rov 17-18 oktyabr kunlari 530 nafar konservatorlar o‘rtasida o‘tkazilgan.
